ꤡꤢ ꤘꤣ ꤢ꤬ꤚꤟꤢꤩ ꤒꤢ꤬ꤊꤜꤢꤧ ꤗꤟꤢꤪꤑꤢ꤭ꤑꤢꤩ꤭ (ꤔꤥ꤬ꤠꤢꤩ꤬ꤙꤢ꤬ꤜꤢꤧ꤭ ꤁꤃ ꤞꤢꤧ꤭) ꤢ꤬ꤋꤢꤧ꤭ ꤔꤛꤣ꤬ꤚꤢꤪ ꤙꤤ ꤊꤢ꤬ꤛꤢ꤭ꤜꤟꤤ꤬ ꤕꤚꤟꤢꤧ꤬ꤙꤢꤧ꤬ꤕꤟꤛꤢꤏꤢꤧ꤭ ꤢ꤬ꤗꤢ ꤁ ꤋꤢ꤭ꤜꤟꤢꤩ ꤢ꤬ꤊꤢꤨ꤭ ꤔꤛꤣ꤬ꤗꤢ꤬ ꤒꤟꤢꤧ꤬ꤏ꤉ꤤ ꤢ꤬ꤗꤟꤢ H1N1 ꤢ꤬ꤙꤢꤧ꤬ ꤕꤢ꤬ꤏꤤ꤭ ꤡꤛꤣꤢꤧꤜꤢ꤭꤯
ꤒꤟꤛꤣꤛꤢꤩ꤭ꤋꤥ꤭ꤑꤟꤢ ꤔꤛꤣ꤬ꤗꤢ꤬ ꤢ꤬ꤙꤢꤧ꤬ ꤒꤟꤢ꤭ꤒꤢꤩ꤬ꤟꤢꤪ ꤒꤟꤢꤧ꤬ꤏ꤉ꤤ ꤔꤛꤣ꤬ꤗꤢ꤬ ꤢ꤬ꤥ꤬ ꤄ ꤕꤚꤟꤢꤧ꤬꤯ ꤚꤢꤪ ꤘꤣ ꤢ꤬ꤚꤟꤛꤣ꤬ ꤒꤢ꤬ꤊꤜꤢꤪ ꤗꤢ꤬ ꤢ꤬ꤥ꤬ꤕꤢ꤭ꤘꤣ ꤒꤟꤢꤧ꤬ꤓꤢꤦꤡꤢꤩ꤭ꤗꤛꤢ ꤢ꤬ꤊꤢꤨ꤭ꤕꤚꤢꤧ꤯
ꤒꤢ꤬ꤓꤢꤦꤟꤢꤪ ꤙꤤ ꤒꤟꤢꤧ꤬ꤏ꤉ꤤ ꤙꤢꤧ꤬ꤜꤟꤢꤪ꤭ ꤕꤚꤟꤢꤧ꤬ꤙꤢꤧ꤬ꤕꤟꤛꤢꤏꤢꤧ꤭ ꤖꤢꤨ ꤒꤢ꤬ꤟꤢꤩ꤬ ꤢ꤬ꤋꤢꤧ꤭ ꤘꤢꤪ꤭ꤊꤢꤨ꤭ ꤕꤚꤟꤢꤧ꤬ꤒꤟꤢꤧ꤬ꤘꤛꤢ꤬ꤋꤢꤨ꤬ ꤥ꤬ꤒꤢ꤬ꤟꤢꤩ꤬ ꤡꤛꤣ ꤜꤟꤢꤦ꤬ꤗꤟꤢꤩ꤬ ꤒꤟꤢ꤭ꤒꤢꤦ꤭ꤜꤟꤢꤪ꤭ ꤊꤜꤛꤢ ꤜꤟꤢꤩ ꤊꤢ꤬ꤓꤢꤩ꤬ ꤊꤢ꤬ꤔꤟꤌꤣ꤭ ꤊꤜꤛꤢꤘꤢꤨ꤬ ꤔꤛꤣ꤬ꤒꤢ꤬ꤙꤥ꤭ ꤕꤚꤢꤧ꤯ ꤢꤧ꤬ꤞꤤ꤭ ꤟꤢꤩꤔꤢ ꤒꤟꤢꤧ꤬ꤏ꤉ꤤ ꤛꤢꤩ꤭ ꤖꤢꤨꤊꤢꤦꤚꤟꤢꤩ ꤢ꤬ꤓꤢꤩ꤬ꤡꤛꤣ ꤕꤢ꤬ꤏꤤ꤭ ꤙꤢꤧ꤬ꤒꤟꤛꤣ ꤊꤟꤌꤣ꤭ ꤘꤣ ꤢ꤬ꤊꤜꤢꤪ꤭ ꤒꤥ꤬ ꤟꤢꤩꤖꤢꤨꤛꤢꤩ꤭꤯ ꤘꤛꤢꤩꤓꤢꤩ꤬ꤘꤛꤢꤩꤔꤟꤌꤣ꤭ ꤒꤥ꤬ ꤟꤢꤩꤗꤢ꤬ꤔꤢꤚꤢꤪ ꤢ꤬ꤘꤛꤢꤩꤡꤛꤣ ꤒꤥ꤬ꤒꤢꤦꤕꤚꤢꤧ ꤘꤣ ꤗꤢꤪ꤬ꤒꤢꤪ꤬ꤏꤣꤧ꤬ꤊꤢꤧ꤬ ꤒꤢ꤬ꤊꤜꤢꤪ, ꤘꤣ ꤊꤢ꤬ꤛꤢ꤭ ꤔꤛꤣ꤬ꤗꤢ꤬ ꤗꤛꤢꤓꤛꤢꤩ꤬ ꤙꤢꤧ꤬ꤚ꤉ꤥ ꤔꤢ ꤊꤜꤛꤢꤘꤢꤨ꤬ ꤡꤛꤣꤓꤢꤩ꤬ ꤘꤣ ꤕꤚꤟꤢꤩꤘꤢꤪ꤭ ꤔꤛꤣ꤬꤯ ꤕꤚꤟꤢꤧ꤬ꤒꤟꤢꤧ꤬ꤘꤛꤢ꤬ꤋꤢꤨ꤬ ꤒꤢ꤬ꤟꤢꤩ꤬ ꤢ꤬ꤗꤟꤢꤩ꤬ꤒꤟꤢ꤭ꤒꤢꤦ꤭ ꤡꤟꤛꤢ ꤒꤢ꤬ꤜ꤉ꤥꤕꤢ꤭ꤒꤥ꤬꤯
ꤚꤢꤪ ꤕꤚꤟꤢꤧ꤬ꤘꤣ ꤢꤨ꤭ꤔꤢꤪ꤭ ꤘꤛꤢ꤬ꤊꤛꤢ꤭ꤢꤧ꤬ ꤜꤟꤥꤋꤢꤦ꤭ ꤗꤢꤪ꤬ꤒꤢꤪ꤬ꤏꤣꤧ꤬ꤊꤢꤧ꤬ ꤘꤣ ꤌꤢꤩ ꤊꤢ꤬ꤘꤢ꤭ ꤢ꤬ꤊꤜꤢꤪ꤭ ꤒꤢ꤬ꤕꤚꤟꤢꤧ꤬ ꤢ꤬ꤟꤢꤩꤕꤟꤢꤩ ꤕꤚꤟꤢꤧ꤬ꤥ꤬ꤕꤟꤢꤪ ꤌꤢꤩ ꤒꤢ꤬ꤊꤜꤢꤪ ꤔꤢ “ ꤞꤤ꤭ ꤔꤢꤪ꤭ꤘꤛꤢ꤬ ꤥ꤬ꤊꤛꤢ꤭ ꤠꤢ꤭ ꤏꤣꤧ꤬ꤊꤢꤧ꤬ ꤚꤢꤪ ꤞꤤ꤭ ꤕꤜꤥ꤭ꤔꤟꤌꤣ꤭ ꤒꤢꤦ ꤠꤢ꤭ ꤔꤟꤢꤩꤊꤜꤢꤪ ꤗꤢ꤬ ꤒꤟꤢꤧ꤬ꤏ꤉ꤤ ꤔꤛꤣ꤬ ꤢ꤬ꤥ꤬ ꤘꤣ ꤏꤢꤧ꤬ꤊꤢꤧ꤬ꤜꤥ꤬ ꤔꤛꤣ꤬ꤟꤟꤢꤧ꤭? ꤚꤢꤪ ꤠꤢ꤭ ꤔꤟꤢꤩꤊꤜꤢꤪꤛꤢꤩ꤭ ꤒꤟꤢꤧ꤬ꤏ꤉ꤤ ꤚꤢꤧ꤭ꤔꤟꤤꤡꤟꤛꤢꤒꤥ꤬ ꤖꤢꤨꤔꤛꤣ꤬ꤟꤟꤢꤧ꤭?" ꤢ꤬ꤟꤢꤩ ꤏꤢꤦ꤬ꤘꤢꤦ꤬ ꤕꤚꤟꤢꤧ꤬ꤒꤟꤢ꤭ꤌꤢꤩ ꤒꤢ꤬ꤊꤜꤢꤪ ꤖꤢꤨꤛꤢꤩ꤭ꤔꤛꤣ꤬꤯
ꤘꤣ ꤢ꤬ꤚꤟꤢꤩꤋꤢꤧ꤭ ꤒꤢ꤬ꤜꤢꤧ꤭ ꤔꤛꤣ꤬ꤗꤢ꤬ ꤗꤛꤢꤓꤛꤢꤩ꤬ꤙꤢꤧ꤬ ꤔꤢ ꤒꤟꤢꤧ꤬ꤏ꤉ꤤ ꤔꤛꤣ꤬ ꤢ꤬ꤙꤢꤧ꤬ꤓꤛꤣ꤭ꤟꤢꤪ ꤘꤣ ꤗꤢꤧ꤬ꤟꤢꤪ꤬ꤏꤢꤪ꤬ ꤠꤟꤤ꤭ꤊꤢꤨ꤭ ꤔꤛꤣ꤬ꤗꤢ꤬ ꤔꤟꤤꤟꤌꤣ꤭ꤙꤢꤧ꤬ ꤘꤣ ꤕꤚꤟꤢꤧ꤬ꤥ꤬ ꤠꤟꤤ꤭ꤊꤢꤨ꤭ ꤒꤢ꤬ꤊꤜꤢꤪ ꤘꤛꤢꤏꤥ꤬ꤕꤟꤢꤩ ꤋꤛꤢꤩ꤭ꤖꤢꤨꤛꤢꤩ꤭ꤔꤛꤣ꤬꤯
ꤒꤟꤢꤧ꤬ꤏ꤉ꤤ ꤓ꤉ꤟꤥ꤭ꤓꤛꤢ꤬ ꤊꤢ꤬ꤜꤢꤨ ꤢ꤬ꤋꤢꤧ꤭ ꤔꤛꤣ꤬ ꤒꤢ꤬ꤘꤢꤪ꤭ꤊꤢꤨ꤭ꤜꤟꤢꤪ꤭ ꤢ꤬ꤗꤟꤢꤩ꤬ ꤒꤢ꤬ꤞꤛꤣ꤭ ꤒꤢ꤬ꤜꤢꤦ꤭ꤡꤢꤪ꤯
ꤏꤛꤣꤋꤢꤧ꤭ ꤋꤥ꤭ꤑꤟꤢ ꤛꤢꤩ꤭ ꤢ꤬ꤒꤟꤢ꤭ꤒꤥ꤭ꤒꤢꤦ ꤒꤟꤛꤣꤟꤢꤪ ꤘꤣ ꤒꤢ꤬ꤋꤢꤦ ꤞꤢꤧꤢꤪ ꤢ꤬ꤋꤢꤧ꤭ꤚꤢꤪ ꤕꤚꤟꤢꤧ꤬ꤜꤟꤢꤨ꤬ ꤒꤢ꤬ꤟꤢꤩ꤬ꤟꤢꤩ꤬ ꤢ꤬ꤟꤛꤢ꤭ ꤘꤣ꤬ꤜꤟꤛꤣ꤭ ꤘꤛꤢꤩꤗꤛꤢꤊꤟꤌꤣ꤭ ꤢꤧ꤬ꤞꤤ꤭ ꤔꤟꤢꤩꤘꤣ ꤒꤟꤢꤧ꤬ꤏ꤉ꤤꤟꤤ꤬ ꤔꤛꤣ꤬ꤗꤢ꤬ ꤒꤢ꤬ꤔꤟꤢꤩ꤬ꤓ꤉ꤟꤥ꤭ ꤜꤟꤢꤪ꤭ꤕꤜꤤ꤭ꤟꤢꤪ ꤢꤧ꤬ꤞꤤ꤭ ꤔꤢ ꤔꤟꤤꤙꤢꤧ꤬ꤡꤟꤛꤢ ꤒꤟꤢꤧ꤬ꤏ꤉ꤤ H1N1 ꤖꤢꤨꤔꤛꤣ꤬꤯ ꤕ꤉ꤟꤥꤒꤢ꤬ꤕꤚꤟꤢꤧ꤬ ꤐꤟꤢꤦꤢꤩ꤬ꤡꤟꤛꤢ ꤕꤢ꤭ꤋꤛꤢꤩ꤭ꤜꤢꤨ꤭ꤒꤥ꤬꤯
ꤒꤟꤛꤣꤛꤢꤩ꤭ꤋꤥ꤭ꤑꤟꤢ ꤕꤚꤟꤢꤧ꤬ꤘꤣ ꤢ꤬ꤔꤟꤤꤙꤢꤧ꤬ ꤒꤟꤢꤧ꤬ꤏ꤉ꤤ ꤔꤛꤣ꤬ꤒꤢ꤬ꤊꤜꤢꤪ ꤢ꤬ꤥ꤬ꤓꤛꤢ꤬ꤟꤢꤪ ꤙꤢꤒꤢꤩ꤭ ꤔꤛꤣ꤬ꤗꤢ꤬ ꤞꤢꤧꤑꤢꤩ꤭ ꤒꤟꤢ꤭ꤒꤢꤩ꤬ꤜꤢ꤭ꤟꤤꤒꤥ꤬꤯ ꤒꤟꤢꤧ꤬ꤋꤢꤨ꤬ ꤞꤢꤚꤢ ꤘꤣ ꤢ꤬ꤊꤜꤢꤪ ꤒꤢ꤬ꤟꤢꤩ꤬ ꤟꤛꤢ꤭ꤔꤟꤌꤣ꤭ ꤗꤛꤢꤊꤢꤨꤛꤢ꤬ ꤘꤛꤢꤩꤕꤢ꤭꤯
ꤚꤢꤪ ꤘꤣ ꤗꤟꤢꤪꤟꤢꤩ ꤢ꤬ꤋꤢꤧ꤭ ꤘꤢꤪ꤭ꤊꤛꤢꤩ꤭ꤋꤢꤨ꤬ ꤢꤧꤓꤥ꤭ ꤘꤛꤢꤏꤥ꤬ꤒꤟꤢ꤭ ꤕꤟꤢꤩꤊꤟꤌꤣ꤭ ꤘꤢꤪ꤭ꤖꤢꤨꤏꤥ꤬ꤖꤢꤨ ꤒꤢ꤬ꤟꤢꤩ꤬ ꤔꤢ ꤒꤟꤢꤧ꤬ꤏ꤉ꤤ H1N1 ꤛꤢꤩ꤭ ꤢ꤬ꤜꤥ꤬ ꤞꤢꤧꤤ꤬ꤏꤢꤩ꤭ ꤒꤢ꤬ꤚꤟꤢꤪ꤬ꤞꤢꤧ ꤔꤢ ꤢꤧ꤬ꤒꤥ꤬꤯ ꤊꤤ꤬ ꤥ꤬ꤗ꤉ꤟꤥ꤭ꤕꤜꤤ꤭ ꤚꤛꤢ ꤘꤛꤢꤩ ꤔꤟꤢꤩꤊꤜꤢꤪ ꤟꤢꤩꤔꤛꤣ꤬ꤗꤢ꤬ ꤒꤟꤢꤧ꤬ꤏ꤉ꤤ ꤔꤛꤣ꤬ꤢ꤬ꤙꤢꤧ꤬ꤡꤟꤛꤢ ꤒꤥ꤬ ꤟꤢꤩꤖꤢꤨꤛꤢꤩ꤭꤯ ꤗꤢ꤬ꤔꤢꤚꤢꤪ ꤕ꤉ꤟꤥ ꤒꤢ꤬ꤕꤚꤟꤢꤧ꤬ ꤞꤢꤧꤕꤜꤢꤪ꤬ ꤗꤢ꤬ꤟꤛꤢ꤭ ꤜꤟꤢꤪ꤭ꤕꤜꤤ꤭꤯
ꤒꤟꤛꤣ ꤗꤟꤢꤪꤑꤢꤩ꤭ ꤔꤥ꤬ꤠꤢꤩ꤬ꤙꤢ꤬ꤜꤢꤧ꤭ ꤂꤄ ꤞꤢꤧ꤭ ꤛꤢꤩ꤭ ꤢ꤬ꤋꤢꤧ꤭ꤗꤢ꤬ ꤏꤛꤣꤋꤢꤧ꤭ ꤢ꤬ꤡꤛꤣ ꤢ꤬ꤞꤢꤧ ꤚꤛꤢꤘꤢꤧ꤬ ꤊꤟꤌꤣ꤭ꤟꤢꤪ꤯ ꤗꤢ꤬ꤔꤢꤚꤢꤪ ꤕꤚꤟꤢꤧ꤬ꤘꤣ ꤢ꤬ꤔꤟꤤꤙꤢꤧ꤬ ꤕꤢ꤭ ꤒꤟꤢꤧ꤬ꤏ꤉ꤤ ꤗꤢ꤬ ꤢ꤬ꤥ꤬ꤕꤢ꤭ꤕꤢ꤭꤯ ꤢꤨ꤭ꤞꤢꤧꤑꤢꤩ꤭ ꤟꤛꤢ꤭ꤚꤟꤥ ꤊꤟꤌꤣ꤭ꤟꤢꤪ ꤒꤟꤢꤧ꤬ꤏ꤉ꤤ ꤔꤛꤣ꤬ ꤢ꤬ꤚꤢꤩ꤬ꤢ꤬ꤊꤛꤢ꤭ ꤚꤢꤪ ꤢꤨ꤭ꤞꤢꤧꤑꤢꤩ꤭ ꤒꤢ꤬ꤊꤢꤪꤒꤢ꤬ꤊꤢꤧ꤬ ꤡꤟꤛꤢꤘꤛꤢꤩꤊꤟꤌꤣ꤭ꤟꤢꤪ꤯
No comments:
Post a Comment