ꤕꤚꤟꤢꤧ꤬ꤚꤢ꤭-ꤊꤥ꤬ꤔꤤ
ꤙꤤ ꤟꤢꤩ꤬ꤋꤢꤨ꤬ꤔꤟꤢꤩꤋꤢꤨ꤬ ꤢ꤬ꤊꤢꤨ꤭ꤛꤢꤩ꤭ ꤒꤟꤢꤧ꤬ꤏ꤉ꤥ꤬ꤏꤢꤪ꤭ꤜꤣ ꤢ꤬ꤗꤟꤢ ꤡꤢꤪꤗꤢ꤬ꤚꤛꤢ꤬ ꤕꤣꤘꤛꤢꤩ ꤔꤛꤣ꤬ꤗꤢ꤬ ꤊꤢ꤬ꤛꤢ꤭ꤜꤟꤤ꤬ ꤖꤢꤨ ꤒꤢ꤬ꤟꤢꤩ꤬ ꤗꤢ꤬ ꤐꤟꤢꤦꤢꤩ꤬ꤘꤢꤦ꤬ ꤖꤢꤨꤛꤢꤩ꤭꤯ ꤘꤣ ꤡꤢꤪꤗꤢ꤬ꤚꤛꤢ꤬ ꤢ꤬ꤜꤢꤧ꤭ ꤗꤢ꤬ ꤒꤢ꤬ꤔꤢꤩꤗꤟꤢꤪꤋꤢꤨ꤬ꤖꤢꤨ ꤔꤢ ꤕꤚꤟꤢꤧ꤬ꤕꤚꤟꤥ꤬ ꤒꤢ꤬ꤟꤢꤩ꤬ ꤢ꤬ꤥ꤬ ꤔꤛꤣ꤬ꤗꤢ꤬ ꤐꤟꤢꤦꤢꤩ꤬ꤕꤟꤥ ꤖꤢꤨꤛꤢꤩ꤭ꤔꤛꤣ꤬꤯
ꤡꤢꤪꤗꤢ꤬ꤚꤛꤢ꤬ ꤜꤟꤢꤪꤕꤜꤤ꤭ ꤔꤛꤣ꤬ꤒꤢ꤬ꤊꤜꤢꤪꤗꤢ꤬ ꤢ꤬ꤗꤟꤢꤩ꤬ꤚꤛꤢ ꤒꤟꤢꤧ꤬ꤕꤟꤢꤩ ꤘꤣ ꤕꤚꤟꤢꤧ꤬ꤜꤟꤢꤨ꤬ ꤢ꤬ꤑꤢꤩ꤭, ꤢ꤬ꤘꤛꤢꤩꤙ꤉ꤤ ꤘꤛꤢꤩꤒꤢ꤬ꤚꤛꤢꤩ꤭ꤢꤨ꤭, ꤚꤢꤪ ꤙꤤ ꤕꤚꤟꤢꤧ꤬ꤜꤟꤢꤨ꤬ ꤒꤢ꤬ꤟꤢꤩ꤬ ꤞꤛꤢꤩ꤭ ꤢ꤬ꤋꤢꤧ꤭ ꤕꤚꤟꤢꤧ꤬ꤜꤟꤢꤨ꤬ ꤐꤟꤢꤐꤟꤥ꤬ ꤔꤛꤣ꤬ ꤢ꤬ꤞꤢꤨ꤭ꤓꤛꤢ꤬ꤕꤟꤢꤩ ꤘꤣ ꤗꤟꤢꤪꤋꤢꤨ꤬ ꤢ꤬ꤓꤛꤢꤩ꤭ꤜꤟꤢꤩꤊꤟꤢꤩꤊꤢꤨ꤭ ꤥ꤬꤯ ꤓꤛꤣ꤭ꤚꤢꤪ ꤕꤚꤟꤢꤧ꤬ꤜꤟꤢꤨ꤬ ꤒꤢ꤬ꤟꤢꤩ꤬ ꤢ꤬ꤊꤢꤦꤚꤟꤢꤩ ꤗꤟꤢꤩ꤬ ꤒꤟꤢꤧ꤬ꤚꤛꤢ ꤢ꤬ꤑꤢꤩ꤭ ꤢ꤬ꤘꤛꤢꤩꤟꤢꤧ꤭ꤘꤛꤢꤩꤚꤢꤩ꤬ ꤒꤢ꤬ꤗꤥ꤭ ꤔꤛꤣ꤬ꤗꤢ꤬ ꤐꤟꤢꤦꤢꤩ꤬ꤖꤢꤨꤛꤢꤩ꤭꤯
ꤡꤢꤪꤗꤢ꤬ꤚꤛꤢ꤬ ꤢ꤬ꤋꤥ꤭ꤕꤢ꤬ꤡꤟꤢꤧ ꤢ꤬ꤗꤟꤢ ꤒꤢ꤬ꤔꤟꤢꤩꤖꤢꤨ ꤒꤢ꤬ꤟꤢꤩ꤬ ꤔꤢ ꤕꤚꤟꤢꤧ꤬ꤕꤚꤟꤥ꤬ ꤒꤢ꤬ꤟꤢꤩ꤬ ꤗꤢ꤬ ꤢ꤬ꤗꤟꤢꤩ꤬ꤒꤢꤩ꤭ꤚꤢꤪ ꤢ꤬ꤞꤢꤨ꤭ꤡꤛꤣ ꤕꤟꤢꤩ ꤕꤚꤟꤢꤧ꤬ꤜꤟꤢꤨ꤬ ꤘꤣ ꤊꤜꤟꤛꤢ ꤘꤣ ꤢ꤬ꤚꤛꤢ ꤒꤢ꤬ꤊꤛꤢꤩ꤭ꤒꤢꤩ꤭ ꤔꤛꤣ꤬ ꤏꤢꤨ꤬ꤘꤛꤢ꤭ꤗꤛꤢ ꤕꤚꤟꤢꤧ꤬ꤘꤣ ꤢ꤬ꤞꤢꤧꤑꤢꤩ꤭ ꤒꤟꤢ꤭ꤕꤜꤢꤨ ꤊꤢ꤬ꤛꤢ꤭ꤜꤟꤤ꤬ ꤢ꤬ꤚꤢꤩ꤬ꤢ꤬ꤊꤛꤢ꤭ ꤢ꤬ꤗꤟꤢ ꤞꤢꤚꤢꤘꤢꤨ꤬ ꤋꤢꤨ꤭ꤓꤢꤧ꤭ꤙꤢꤨ꤭ꤖꤢꤧ꤭ ꤗꤢ꤬ ꤟꤢꤩꤏꤥ꤬ ꤖꤢꤨꤛꤢꤩ꤭ꤔꤛꤣ꤬꤯
“ ꤒꤢ꤬ꤔꤢꤩꤖꤢꤨ ꤟꤢꤩꤔꤛꤣ꤬ꤗꤢ꤬ ꤢ꤬ꤗꤟꤢ ꤡꤢꤪꤗꤢ꤬ꤚꤛꤢ꤬ ꤙꤛꤢꤜꤟꤛꤢ꤬ꤘꤛꤢꤩ ꤢ꤬ꤒꤢ꤬ꤔꤟꤢꤩ ꤘꤛꤢꤩꤘꤢꤦ꤬ꤔꤟꤤ꤯ ꤓꤛꤣ꤭ꤚꤢꤪ ꤕꤚꤟꤢꤧ꤬ꤜꤟꤢꤨ꤬ ꤒꤢ꤬ꤕꤚꤟꤢꤧ꤬ ꤗꤢ꤬ ꤢ꤬ꤙꤛꤢꤜꤟꤛꤢ꤬ ꤕꤟꤢꤩꤜꤢꤨ꤭ ꤢ꤬ꤒꤢ꤬ꤔꤢꤩ ꤘꤛꤢꤩꤘꤢꤦ꤬꤯ ꤖꤢꤨꤔꤛꤣ꤬ꤚꤢꤪ ꤒꤢ꤬ꤔꤢꤩꤗꤢ꤬ ꤢ꤬ꤟꤢꤩꤞꤛꤥ ꤟꤢꤩꤕꤢꤪ꤭ꤕꤟꤢꤩ ꤕꤚꤟꤢꤧ꤬ꤜꤟꤢꤨ꤬꤯ ꤊꤤ꤬ꤘꤢ꤭ꤔꤢ ꤕꤚꤟꤢꤧ꤬ꤜꤟꤢꤨ꤬ ꤒꤢ꤬ꤕꤚꤟꤢꤧ꤬ ꤢ꤬ꤒꤢ꤬ꤔꤢꤩ ꤥ꤬ꤕꤢ꤭ꤒꤥ꤬ ꤟꤢꤩꤗꤢ꤬ ꤢ꤬ꤙ꤉ꤤꤚꤛꤢ ꤕꤢ꤭ꤒꤥ꤬ꤟꤢꤪ꤯ ꤢ꤬ꤏ꤉ꤤ ꤢ꤬ꤏꤢꤧ꤭, ꤢ꤬ꤞꤛꤢꤩ꤭ ꤗꤟꤢꤩ꤬ꤖꤢꤨꤔꤛꤣ꤬꤯ ꤓꤛꤣ꤭ꤚꤢꤪ ꤢ꤬ꤛꤢꤊꤤ ꤔꤛꤣ꤬ꤗꤢ꤬ ꤢ꤬ꤓꤢꤩ꤬ꤡꤛꤣꤊꤛꤢ꤭ ꤚꤢꤪ ꤢ꤬ꤞꤛꤢꤩ꤭ꤊꤛꤢ꤭”
ꤊꤢ꤬ꤛꤢ꤭ꤜꤟꤤ꤬ ꤗꤛꤢꤩ꤭ꤡꤣ꤬ꤖꤢꤨ ꤒꤢ꤬ꤟꤢꤩ꤬ ꤐꤟꤢꤦꤢꤩ꤬ꤘꤛꤢꤩ ꤔꤢ ꤙꤤ ꤟꤢꤩ꤬ꤋꤢꤨ꤬ꤛꤢꤩ꤭ ꤋꤢ꤬ꤔꤛꤢ꤭ꤗꤢꤪ꤬ ꤘꤣ ꤢ꤬ꤗꤟꤢꤩ꤬ꤡ꤉ꤟꤥ ꤕꤚꤟꤢꤧ꤬ꤜꤟꤢꤨ꤬ ꤔꤛꤣ꤬ꤗꤢ꤬ ꤢ꤬ꤥ꤬ꤢꤧꤑꤢ꤬ꤡꤢꤪ꤯
ꤙꤤꤔꤛꤣ꤬ ꤢ꤬ꤊꤜꤢꤧ꤭ ꤒꤢ꤬ꤔꤢꤩ ꤘꤣ ꤢ꤬ꤗꤟꤢꤩ꤬ꤡ꤉ꤟꤥꤚꤛꤢ ꤕꤚꤟꤢꤧ꤬ꤜꤟꤢꤨ꤬ꤗꤢ꤬ ꤢ꤬ꤥ꤬, ꤚꤢꤪ ꤒꤢ꤬ꤔꤢꤩ ꤘꤣ ꤢ꤬ꤗꤟꤢꤩ꤬ꤕꤛꤢꤩ ꤕꤚꤟꤢꤧ꤬ꤜꤟꤢꤨ꤬ ꤗꤢ꤬ ꤢ꤬ꤥ꤬ꤥ꤬꤯ ꤚꤢꤪ ꤋꤤ꤭ꤔꤢꤪ꤭ꤋꤤ꤭ꤔꤢꤩ ꤘꤣ ꤢ꤬ꤗꤟꤢꤩ꤬ꤕꤛꤢꤩ ꤤ꤬ꤜꤥ꤬ꤤ꤬ꤜꤟꤛꤢꤕꤛꤢꤩ ꤕꤚꤟꤢꤧ꤬ꤜꤟꤢꤨ꤬ ꤔꤛꤣ꤬ꤗꤢ꤬ ꤢ꤬ꤥ꤬ꤚꤟꤥꤜꤢ꤭꤯
ꤋꤤ꤭ꤔꤢꤪ꤭ꤋꤤ꤭ꤔꤢꤩ ꤒꤢ꤬ꤊꤜꤢꤪ ꤗꤢ꤬ ꤢ꤬ꤥ꤬ꤘꤣ ꤞꤎꤢꤪ꤬ꤊꤜꤢꤧ꤭ ꤠꤟꤢꤧ꤬ꤊꤜꤢꤧ꤭ ꤓꤛꤣ꤭ ꤢ꤬ꤗꤟꤢꤩ꤬ꤏ꤉ꤤ ꤗꤟꤢꤩ꤬ꤏꤢꤧ꤭ ꤕꤚꤟꤢꤧ꤬ꤜꤟꤢꤨ꤬꤯ ꤊꤤ꤬ꤘꤢ꤭ꤔꤢ ꤢꤧ꤬ꤞꤤ꤭ ꤞꤢꤧꤐꤟꤢꤦꤢꤩ꤬ ꤏꤢꤧ꤬ꤢꤩ꤬ꤏꤢꤧ꤬ꤥ꤭ ꤟꤢꤩꤗꤢ꤬ ꤙꤢꤧ꤬ꤘꤛꤢꤩꤢꤩ꤬ꤙꤢꤧꤜꤢꤨ꤭ ꤒꤢꤦꤚꤢꤪ ꤒꤟꤢꤧ꤬ꤏ꤉ꤤꤒꤟꤢꤧ꤬ꤏꤢꤧ꤭ ꤢ꤬ꤏꤤ꤭ꤗꤟꤢꤩ꤯
ꤋꤢꤨ꤭ꤓꤢꤧ꤭ꤙꤢꤨ꤭ꤙꤢꤧ꤬ ꤟꤢꤩꤏꤥ꤬ꤕꤟꤢꤩ ꤔꤢ “ꤋꤤ꤭ꤔꤢꤪ꤭ꤋꤤ꤭ꤔꤢꤩ ꤢ꤬ꤗꤟꤢꤩ꤬ꤙꤢꤧ꤬ꤟꤢꤪ ꤟꤢꤩꤗꤢ꤬ ꤕꤚꤟꤢꤧ꤬ꤜꤟꤢꤨ꤬ ꤗꤢ꤬ ꤢ꤬ꤙꤢꤧ꤬ꤏꤤ꤭ꤕꤜꤤ꤭ ꤊꤟꤢ꤬ꤋꤛꤢꤩ꤭ꤞꤛꤢꤔꤢ ꤕꤟꤢꤨ, ꤕꤢ꤬ꤔꤟꤢꤧ, ꤓꤛꤢ, ꤏꤛꤢꤩ꤭ ꤒꤢ꤬ꤟꤢꤩ꤬꤯”
ꤗꤟꤢꤩ꤬ꤖꤢꤨꤔꤛꤣ꤬ꤚꤢꤪ ꤒꤢ꤬ꤔꤢꤩ ꤘꤣ ꤢ꤬ꤚꤛꤢ ꤒꤢ꤬ꤊꤜꤢꤪꤗꤢ꤬ ꤢ꤬ꤟꤢꤩꤞꤛꤥ ꤟꤢꤩꤕꤢꤪ꤭ ꤒꤢ꤬ꤗꤥ꤭ ꤕꤚꤟꤢꤧ꤬ꤜꤟꤢꤨ꤬ ꤔꤢ ꤙꤢꤧ꤬ꤗꤟꤢꤩ꤬ꤒꤟꤢꤧ꤬ꤘꤣ ꤢ꤬ꤚꤛꤢ꤯ ꤙꤤ ꤟꤢꤩ꤬ꤋꤢꤨ꤬ ꤢ꤬ꤊꤢꤨ꤭ꤛꤢꤩ꤭ ꤒꤢ꤬ꤔꤢꤩ ꤘꤣ ꤢ꤬ꤚꤛꤢ, ꤒꤢ꤬ꤔꤢꤩꤘꤣ ꤢ꤬ꤚꤛꤢꤒꤥ꤬, ꤔꤢ ꤋꤤ꤭ꤔꤢꤪ꤭ꤋꤤ꤭ꤔꤢꤩ ꤒꤢ꤬ꤟꤢꤩ꤬ꤗꤢ꤬ ꤢ꤬ꤙꤢꤧ꤬ꤊꤛꤢꤔꤢ ꤐꤟꤢꤐꤟꤥ꤬ꤛꤢꤊꤤ ꤒꤢ꤬ꤊꤛꤢꤩ꤭ ꤔꤛꤣ꤬ꤗꤢ꤬ ꤊꤢ꤬ꤛꤢ꤭ꤜꤟꤤ꤬ ꤖꤢꤨꤒꤢ꤬ꤟꤢꤩ꤬ ꤐꤟꤢꤦꤢꤩ꤬ꤘꤛꤢꤩ ꤖꤢꤨꤛꤢꤩ꤭ꤔꤛꤣ꤬꤯
ꤖꤢꤨ ꤊꤢ꤬ꤛꤢ꤭ꤜꤟꤤ꤬ ꤒꤢ꤬ꤟꤢꤩ꤬ ꤐꤟꤢꤦꤢꤩ꤬ꤘꤛꤢꤩ ꤔꤛꤣ꤬ꤗꤢ꤬ ꤙꤤ ꤒꤢ꤬ꤔꤢꤩ ꤢ꤬ꤊꤜꤢꤧ꤭ ꤢ꤬ꤥ꤬ꤕꤢ꤭ ꤢ꤬ꤗꤛꤢꤩ꤭ ꤢ꤬ꤡꤣ꤬ꤡꤣ꤬ ꤟꤢꤩꤖꤢꤨꤛꤢꤩ꤭꤯ ꤚꤢꤪ ꤒꤢ꤬ꤔꤢꤩ ꤔꤛꤣ꤬ꤗꤢ꤬ ꤢ꤬ꤥ꤬ꤕꤢ꤭ ꤔꤢ ꤢ꤬ꤋꤢ꤭ꤜꤟꤢꤩ, ꤢ꤬ꤒꤟꤥ ꤒꤢ꤬ꤡꤣ꤬ꤔꤢ ꤒꤢ꤬ꤡꤣ꤬꤯ ꤚꤢꤪ ꤢ꤬ꤒꤟꤥꤘꤣ ꤢ꤬ꤜꤢꤧ꤭, ꤢ꤬ꤊꤛꤢ꤭ꤜꤣ ꤒꤢ꤬ꤘꤢꤦ꤬ ꤔꤛꤣ꤬ꤗꤢ꤬ ꤢ꤬ꤗꤟꤢꤟꤢꤪ ꤒꤢ꤬ꤔꤢꤩꤘꤣ ꤢ꤬ꤚꤛꤢꤒꤥ꤬ ꤒꤢ꤬ꤟꤢꤩ꤬ ꤢ꤬ꤥ꤬ ꤐꤟꤢꤦꤢꤩ꤬ꤖꤢꤨꤛꤢꤩ꤭꤯
ꤒꤢ꤬ꤔꤢꤩꤖꤢꤨ ꤗꤢ꤬ ꤢ꤬ꤥ꤬ꤕꤢ꤭ ꤢ꤬ꤗꤛꤢꤩ꤭ ꤢ꤬ꤡꤣ꤬ꤡꤣ꤬꤯ ꤡꤢꤪꤗꤢ꤬ꤚꤛꤢ꤬ ꤗꤢ꤬ ꤢ꤬ꤥ꤬ꤊꤟꤌꤣ꤭ ꤘꤢꤦ꤬ ꤔꤢ ꤢ꤬ꤒꤢ꤬ꤔꤢꤩ꤯ ꤚꤢꤪ ꤕꤚꤟꤢꤧ꤬ꤜꤟꤢꤨ꤬ꤗꤢ꤬ ꤢ꤬ꤥ꤬ꤋꤢꤪ꤬ꤊꤟꤌꤣ꤭ ꤘꤢꤦ꤬ꤕꤢ꤭ ꤔꤢ ꤢ꤬ꤒꤢ꤬ꤔꤢꤩ꤯
ꤒꤢ꤬ꤔꤢꤩ, ꤐꤟꤢꤐꤟꤥ꤬ ꤛꤢꤊꤤ ꤥ꤬ꤙꤤ ꤟꤢꤩ꤬ꤋꤢꤨ꤬ ꤛꤢꤩ꤭ ꤜꤟꤢꤪꤕꤜꤤ꤭ ꤗꤢ꤬ ꤡꤢꤪꤗꤢ꤬ꤚꤛꤢ꤬ ꤢ꤬ꤊꤤ꤬ ꤕꤜꤥ꤭ꤢꤧ꤬ꤞꤤ꤭ ꤒꤥ꤬ꤟꤢꤩꤗꤢ꤬ ꤢ꤬ꤓꤢꤩ꤬ꤡꤛꤣ ꤡꤟꤛꤢꤘꤣ ꤟꤢꤩ꤬ꤋꤢꤨ꤬ ꤢ꤬ꤊꤜꤢꤪ꤭ꤒꤥ꤬꤯ ꤚꤢꤪ ꤒꤢ꤬ꤔꤢꤩ ꤔꤛꤣ꤬ꤒꤢ꤬ꤊꤜꤢꤪ ꤗꤢ꤬ ꤢ꤬ꤙꤢꤧ꤬ꤥ꤬ꤕꤚꤢꤧ ꤙꤤ ꤟꤢꤩ꤬ꤋꤢꤨ꤬ꤛꤢꤩ꤭ ꤢ꤬ꤋꤢ꤭ꤜꤟꤢꤩ ꤔꤢ ꤢ꤬ꤒꤟꤥ ꤘꤛꤢ꤬ꤒꤟꤢ꤭ꤥ꤬ ꤕꤟꤢꤩꤢꤧ꤬ꤞꤤ꤭ ꤔꤛꤣ꤬ꤗꤢ꤬ ꤊꤢ꤬ꤛꤢ꤭ꤜꤟꤤ꤬ ꤖꤢꤨꤒꤢ꤬ꤟꤢꤩ꤬ ꤐꤟꤢꤦꤢꤩ꤬ꤘꤛꤢꤩ ꤖꤢꤨꤛꤢꤩ꤭ꤔꤛꤣ꤬꤮꤯
